– Det er alltid gøy å vinne! Dette har vore eit veldig vellykka prosjekt, og då er det gledeleg at arbeidet vårt blir sett så stor pris på, seier administrerande direktør Harald Nikolaisen i Statsbygg.

Ambassaden i den amerikanske hovudstaden bestod inntil nyleg av ein ambassadørbustad frå 1931 og eit kanselli med kontor, møtelokale og servicefunksjonar frå 1978.

I prosjektet blei kanselliet totalrehabilitert med Fentress Architects som arkitektar. For å minimere prosjektets CO2-avtrykk blei råbygget og berande konstruksjonar beheldt. 40 år gammal kalkstein i fasaden er gjenbrukt, fasaden er opna opp med større glasparti, bygget er blitt universelt utforma og hagen er planert. Prosjektet har gitt meir effektiv arealbruk og opnar for enda høgare aktivitet på ambassaden.

– Det kanskje aller viktigaste ved rehabiliteringa er likevel at funksjonaliteten til ambassadørbustaden og kanselliet har auka betrakteleg fordi vi har bunde dei saman med noko heilt nytt, fortel Nikolaisen.

Atlanterhavshallen er både eit forsamlingslokale, ei hagestove og ein stor passasje mellom dei to andre bygningane. Her er det plass til 200 personar, og hallen blir no brukt dagleg til både møter, arrangement og andre tilstellingar. Hallen sin glasfasade mot hagen kan opnast heilt og kople rommet saman med uteområda, som tidlegare var lite i bruk.